Сар бүр Монголын Үндэсний Олимпийн Хорооноос тодруулж буй "Сарын шилдэг тамирчин" шалгаруулалтын дүн гарч, аравдугаар сарын ялагчаар 3х3 баг тодорлоо.Тэд Улаанбаатар хотноо зохиогдсон Азийн аварга шалгаруулах тэмцээнд түрүүлсэн бөгөөд энэ сарын санал агуулсад түрүүллээ. Шагналыг EMT компанийн гүйцэтгэх захирал Б.Баярсайхан ивээн тэтгэн, шагналыг гардууллаа.
Монголын сагсан бөмбөгчид нийт 15 баг оролцсон уг тэмцээнд түрүүлж, азийн аварга болох замдаа Австрали, Шинэ Зеландын багийг буулгаж авсан билээ. Уг тэмцээний хамгийн үнэ цэнтэй тоглогчоор Монголын багийн тамирчин Э.Дөлгөөн тодорсон. Мөн 3х3 сагсан бөмбөгийн төрөл нь 2020 оны Олимпийн наадмын хөтөлбөрт албан ёсоор багтаад байгаа юм.
Шалгаруулалтын 2-р байрт Тайландын Бангкок хотноо болсон хүндийг өргөлтийн дэлхийн цомын аваргаар тодорсон Г.Ануужин орсон бол 3-р байрт жүдо бөхийн залуучуудын ДАШТ-ээс мөнгөн медаль хүртсэн Л.Энхрийлэн нэрлэгджээ.
"Сарын шилдэг тамирчин" шалгаруулах олон нийтийн санал асуулгад нийт 1000 гаруй хөгжөөн дэмжигч оролцсон бөгөөд спортын чиглэлээр дагнан ажиллаж буй сэтгүүлчдийн саналтай нэгтгэгдэн дүн гарсан нь энэ юм.
0
0
0
0
0
0
