Бэлгэдэл: Хүүхдэд ээлтэй цэцэг тул хүүхдийн өрөө, цэцэрлэг, сургуульд ургуулахад хамгийн тохиромжтой. Ер нь л хүүхэд байгаа газар энэ цэцэг байх учиртай. 

Орчинд үзүүлэх нөлөө: Зузаахай нь олон наст тасалгааны ургамал бөгөөд удаан цэцэглэдэг олон өнгийн цэцгээрээ гэртм үзэмж нэмдэг. Мөн түлэнхий арьсны улайлт зэрэгт навчийг нь бага зэрэг зөөлрүүлж байгаад тавихад сайн байдаг юм.

Арчилгаа: Ургахдаа амархан, арчилгаа багатай. Цэцэгчид цэцэг анх ургуулж буй хүмүүст зөвлөдөг.

Гэрэл: Гэрэлсэг ургамал. Хангалттай гэрэлтэй газар буюу  урд, баруун зүгийн цонхон дээр байрлуулахад тохиромжтой. Ид зуны үед хэт наранд удаан байлгавал навч улайж түлэгддэг. Гэрэл дутвал иш нь сунаж ургадаг.

Усалгаа: Ус харьцангуй бага шаарддаг ба кактус, шүүслэг ургамлуудын адил навч ишиндээ усыг их хэмжээгээр нөөцөлсөн байдаг тул усалгааг тохируулах хэрэгтэй. Хоёр усалгааны хооронд хөрсний өнгөн хэсэг хатсаны дараа усалгааг хийнэ. Навчинд алсаас шүршиж чийг өгч болох ч нойтон алчуураар үрж арчиж болохгүй. Усалгааны дараа сууринд тунасан илүүдэл усыг дор бүр нь асгана. 

Бусад: Зузахай ургалт хурдан цэцэг учраас хэт сунаж хэлбэргүй ургахаас сэргийлж тайралт хийж байх хэрэгтэй.