Зууны мэдээ сонины 2018 оны 1-р сарын 31-ний өдрийн дугаарын “Б.Баттөмөрийн “Төсөл” балаг тарихаар айсуй” нийтлэлтэй холбогдуулж дараахь залруулгыг хүргэж байна.

Дээрх нийтлэл нь Улсын Их Хурлын гишүүний бүрэн эрхэд халдсан, бодит байдалд нийцээгүй, хууль зөрчсөн, нотолгоогүй, гүтгэлгийн шинжтэй болжээ. Гүтгэлгийн тухайд Зөрчлийн тухай хуулийн 6.21 дүгээр зүйлийг зөрчсөн байж болзошгүй байна.

Улсын Их Хурлын тухай хуулийн 7.1.3 дахь заалтын дагуу УИХ –ын Гишүүн нь хууль, Улсын Их Хурлын шийдвэрийн төсөл санаачлах бүрэн эрхтэй. Бүрэн эрхийнхээ дагуу УИХ–ын гишүүн Б.Баттөмөр Тамхины хяналтын тухай хуульд нэмэлт, өөрчлөлт оруулах хуулийн төсөл /Цаашид “Хуулийн төсөл” гэх/-ийг УИХ–ын бусад нэр бүхий 8 гишүүдийн хамт санаачилсан байна.

Хуулийн төслийн талаар Засгийн газар саналаа Улсын Их Хурлын гишүүн Б.Баттөмөрт 2017 оны 9-р сарын 27-ны өдрийн хуралдааны 42 дугаар тэмдэглэлээр хүргүүлсэн бөгөөд Засгийн газраас Хуулийн төслийг буцаагаагүй, харин хуулийн төсөлд санал хүргүүлсэн байна. УИХ–ын гишүүний санаачилсан хуулийн төслийг буцаах эрх Засгийн газарт байхгүй. Тамхины хяналтын тухай хуульд нэмэлт, өөрчлөлт оруулах хуулийн төсөл http://forum.parliament.mn/projects/268 гэсэн холбоос дээр өргөн мэдүүлсэнээр байршуулсан байна.

Тамхины тухай хуульд нэмэлт, өөрчлөлт оруулах нь Монгол Улсын Үндсэн хуулийн 16 дугаар зүйлд заасан иргэний эрх, эрх чөлөө буюу эрүүл, аюулгүй орчинд амьдрах, орчны бохирдолоос хамгаалуулах, эрүүл мэндээ хамгаалуулахтай холбоотой болно. Тамхины хяналт, хуулийн хэрэгжилтийг сайжруулах, хэрэгжүүлэх механизмыг тодорхой болгох, Монгол Улсын олон улсын гэрээнд нийцүүлэх, Хуулийн төслийн үзэл баримтлалд заасан бусад зорилгоор хуулийн төслийг санаачилсныг 20 сая төгрөг авахын тулд хийж буй ажил мэтээр олон нийтэд буруу ташаа мэдээлэл цацсан байна. Бодит байдал дээр УИХ–ын Гишүүн нь хууль санаачлах болгондоо 20 сая төгрөг авдаггүй гэдгийг хэлэх нь зүйтэй.

Монгол Улс Дэлхийн Эрүүл Мэндийн Байгууллага (ДЭМБ)-ын Тамхины хяналтын суурь конвенци /цаашид “ТХСК” гэх/-ийг соёрхон баталсан анхны орнуудын нэг бөгөөд нэгдэн орсон тухай хууль хүчин төгөлдөр болмогц дотоодын хууль тогтоомжийн нэгэн адил үйлчилнэ. Сүүлийн жилүүдэд тамхины хэрэглээтэй холбоотой хорт хавдар, зүрх судас, амьсгалын замын өвчлөл, нас баралт тогтвортой буурахгүй байгаа бөгөөд 3 хүн тутмын нэг нь зүрх судасны эмгэгээр, 4 хүн тутмын нэг нь хавдрын улмаас эндэх болсон гэсэн судалгаа байдаг. Иймээс тамхины хяналтыг цогцоор нь сайжруулж, хүн амын дундах тамхины хэрэглээг бууруулбал нийт өвчлөлийн 70 гаруй хувийг зээлж байгаа халдварт бус өвчнөөс шалтгаалсан өвчлөл, нас баралтыг бууруулах боломж байна.

Дээрх үндэслэл, зорилгоор Тамхины хяналтын тухай хуульд нэмэлт өөрчлөлт оруулах хуулийн төслийг боловсруулж, өргөн мэдүүлсэн байна. Тус хуулийн төсөлд олон улсын, мэргэжлийн, олон нийтийн байгууллагууд өргөнөөр санал өгч төсөл санаачлагч болон холбогдох байнгын хороонд ч хүргүүлсэн баримтууд байна.

Үндэслэлгүйгээр, нотолгоогүйгээр, УИХ–ын гишүүн Б.Баттөмөрийг гүтгэсэн мэдээллийг нийтэлсэн явдалдаа “Зууны мэдээ” сонины зүгээс хүлцэл өчиж байна. Хууль санаачлах бүрэн эрхээ хэрэгжүүлэх, олон нийт, хүүхэд, залуучуудын эрүүл мэндийн төлөө идэвх зүтгэл гаргаж буй Б.Баттөмөр гишүүн Таны цаашдын эрхэм үйлсэд амжилт хүсье!