Улсын Их Хурлын гишүүн, Байгаль орчин, хүнс, хөдөө аж ахуйн байнгын хорооны дарга Ц.Гарамжав өнөөдөр (2017.10.02) олон улсын Тахь группийн ерөнхийлөгч Рэйнхард Шнайдригийг хүлээн авч уулзав.

Уулзалтад Улсын Их Хурлын гишүүн, тус байнгын хорооны гишүүн О.Батнасан, Тахь группийн Монгол дахь салбарын дарга Н.Энхсайхан, тахь судлаач О.Доржраа  болон Тахь группийн Санхүүгийн албаны дарга Ребека Блумэр нар оролцлоо. 

Уулзалтын эхэнд Тахь группийн ерөнхийлөгч Рэйнхард  Шнайдриг, Тахийг монгол эх нутагт нь сэргээн нутагшуулсны 25 жилийн ой 2017 онд тохиож байна. Тиймээс энэ амьтныг  өсгөн үржүүлэх, хамгаалахтай холбоотой тулгамдсан асуудлын талаар санал солилцох зорилготой байна хэмээв.

Тэрбээр тахийн тоо толгой 600 дөхөж байгааг дуулгаад, тоо толгой нь өсөхийн хэрээр бэлчээрийг томсгох шаардлагатай болсныг хэллээ. Тахийн сүрэг бэлчээрлэдэг газар нутгаасаа гарч, хил давах асуудал ч үүсэж болзошгүй учир бэлчээрлэх газар нутгийг томсгон, тусгай хамгаалалтад авах хуулийн төсөл боловсруулан Байгаль орчин, аялал жуулчлалын яаманд өргөн барисан бөгөөд удахгүй энэ асуудал УИХ-д орж ирэхэд дэмжиж өгөхийг хүсч буйгаа илэрхийллээ.

Улсын Их Хурлын гишүүн, Байгаль орчин, хүнс, хөдөө аж ахуйн байнгын хорооны дарга Ц.Гарамжав “Тахийг эх нутагт нь сэргээн нутагшуулах ажлыг хөрөнгө санхүү гарган, амжилттай хийж, хэрэгжүүлж байгаа олон улсын Тахь группэд Монголын парламентын өмнөөс талархал илэрхийлье” гээд тахь бэлчээрлэх тусгай хамгаалалттай газар нутгийг өргөтгөх асуудлыг процессийн дагуу УИХ-д оруулж ирэхэд Байгаль орчин, хүнс, хөдөө аж ахуйн байнгын хороо дэмжиж, шуурхай шийдвэрлүүлэхэд анхаарч ажиллана” гэв.

Улсын Их Хурлын гишүүн О.Батнасан “Би хэдхэн хоногийн өмнө тахийн тархац нутаг болгох гэж буй газар нутгаар тахь судлаач мэргэжлийн хүмүүсийн хамт яваад ирлээ. Тухайн бүс нутаг айл өрх цөөн, онгон зэрлэг байгальд дасан зохицсон энэ амьтны нутаглэх бэлчээр болоход бүрэн тохиромжтой. Тахийг эх нутагт нь өсгөн үржүүлж буй энэ төслийг миний бие ямагт дэмжиж ажиллана. Цаашид тахийн сүрэг унаган байгалийн эко үзмэр ч болох боломжтой” гээд төлөөлөгчдөд ажлын амжилт хүслээ.  

Одоогоор тахийн тархац нутаг улсын тусгай хамгаалалтад бүрэн хамрагдсан бөгөөд цаашид Хустайн нуруу, Хомын тал, Тахийн тал хэмээх газар нутгуудад өсөж үржиж байгаа сүргийн бэлчээрлэх нутгийг томсгон, тусгай хамгаалалтад авах асуудлаар талууд бүрэн санал нийлж, цаашид өсгөн үржүүлэх, хамгаалахад төрийн зүгээс хэрэгтэй дэмжлэг тусламжийг төсөл хэрэгжүүлэгчдэд үзүүлж байхаар ярилцлаа гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.