Засгийн газрын 2016-2020 оны үйл ажиллагааны хөтөлбөрт "Ач санах хууль”-ийг батлуулж, азай буурлуудад "Насны хишиг" олгох эрх зүйн орчинг бүрдүүлнэ гэж тусгасан билээ.  Тэгвэл "Насны хишиг"-ийг жил бүр билгийн тооллын хаврын тэргүүн сар-цагаан сар, Үндэсний их баяр наадам, Ардын хувьсгалын ойн баярыг тохиолдуулан Монгол Улсын дараах насны иргэнд доор дурдсан хэмжээгээр жилд хоёр удаа олгохоор хуульчилсан юм.

Үүнд:  

-65-69 настай ахмад настанд тавин мянган төгрөг;

-70-79 настай ахмад настанд наян  мянган төгрөг;

-80-89 настай ахмад настанд нэг зуун тавин мянган төгрөг;

-90 ба түүнээс дээш настай ахмад настанд хоёр зуун тавин мянган төгрөгийг тус тус олгох юм.

   Энэ жилийн эхний "Насны хишиг"-ийг өнгөрсөн хоёрдугаар сарын 01-ний өдрөөс эхлэн өгсөн юм. Цагаан сараар олгосон "Насны хишиг"-ийг нийт 114,434 ахмад настан авсан бөгөөд үүнд 9,5 тэрбум төгрөг зарцуулсан байна.

Тэгвэл Ардын хувьсгалын ойн баярыг тохиолдуулан өчигдрөөс эхлэн хоёр дахь удаагийн “Насны хишиг”-ийг олгож эхэлжээ. Улсын хэмжээнд 65-69 насны 44696 ахмад, 70-79 насны 52413 ахмад, 80-89 насны 17559 ахмад, 90-ээс дээш насны 2366 ахмад нийт 117,034 ахмад настны “Насны хишиг” олгох жагсаалтыг гэрээт банкуудад илгээж, 10,1 тэрбум төгрөгийн санхүүжилтийг олгоод байна.

     Мөн “Насны хишиг”-ийг банкууд ахмадуудын өр зээлэнд суутгах хориотой юм.