Ерөнхий сайд Г.Занданшатар УИХ-ын гишүүн Н.Номтойбаярыг Тэргүүн Шадар сайдаар ажиллуулах санал тавьсан талаар хэвлэлүүд мэдээлсэн. Тэгвэл тэрбээр юунаас болж татгалзсан талаар тайлбар хийлээ. 

Тэрбээр: “Ерөнхий сайд Г.Занданшатарын зүгээс УИХ-д суудалтай “Үндэсний эвсэл” намын гишүүдтэй Засгийн газраа хамтран бүрдүүлье гэдэг саналыг албан бичгээр өгсөн. Тэр асуудлаар бид уулзсан. 

Шинэ Ерөнхий сайд Г.Занданшатар маань энэ улс оронд тулгамдаад байгаа асуудлуудын талаар зөв оновчтой гарц шийдэл эрэлхийлж, ажиллая гэж шийдсэн нь маш их таалагдсан. 

 

Тодорхой эдийн засаг, нийгмийн хүрээнд хэд хэдэн асуудлыг хөндсөн. Түүн дээр илэрхийлж байгаа байр суурь бол үнэхээр зөв оновчтой гарц шийдлийг харж байгаа юм байна гэж ойлгосон. 

Товчхондоо энэ хүн ерөнхий сайдаар ажиллаж чадах юм байна гэх итгэл надад төрсөн. Гэсэн хэдий ч миний хувьд шинэ Засгийн газартай хамтарч ажиллах саналаас татгалзсан. 

Яагаад гэвэл мэдээж хэд хэдэн шалтгаанууд бий. Хамтарч ажиллах тохиолдолд Шадар сайдын түвшинд хамтрач ажиллая гэдэг санал тавьсан. Миний мэддэг хийж чадах тодорхой хэдэн чиглэлүүд байдаг. 

 

Гэхдээ ямарч тохиолдолд би сайд л болж байвал юу ч хийсэн яахав гэж бодож явдаг хямдхан улс төрч биш. 

Хамгийн гол нь ажил хэргийн хүрээнд тодорхой асуудал хариуцлаа гэхэд тодорхой үр дүн гарах л ёстой. Энийгээ л би баримтласан. 

Хоёрт шинэ Ерөнхий сайд Г.Занданшатар маань УИХ-ын гишүүн биш. Улс төрийн эрх мэдэл байхгүй. Би өөрөө улс төрийн мэдэлгүй байсан Ж.Эрдэнэбатын кабенитад ажиллаж байсан. 

 

Засгийн газрын тэргүүнд улс төрийн эрх мэдэл байхгүй үед ажил явуулахад маш их хүндрэлтэй байдаг. 

Надад байгаа мэдээллээр өөрийх нь Засгийн газрын кабинетад орсон хүмүүс 100 хувь өөрийнх нь хүсэн хүлээсэн кабинет биш. Энэ бол эрх мэдэлгүй хүний зовлон. 

Янз бүрийн бүлэглэлүүдийн шахаас МАН-ын Удирдах зөвлөлийн бодлого гэх мэтчилэн үндсэндээ Засгийн газрын тодорхой нэр бүхий гишүүд яах аргагүй тйимэрхүү байдлаар л томилогдчихлоо. Энэ нь бас надад таалагдаагүй. 

Мэдээж кабинетын зарчим гэдэг бол тодорхой чиг үүрэгтэй хэдий ч бусадтайгаа хүйн холбоотой ажилладаг ийм л зарчим. 

Тэр үүднээсээ миний тавих шаардлагад 100 хувь нийцээгүй учраас бусадад нь бас боломж олгох үүднээс би Засгийн газарт хамтарч ажилахгүй гэдэг шийдвэрийг гаргасан”гэв.