Өвлийн морин уралдааныг эсэргүүцэж Хөдөлмөрийн сайд асан Г.Баярсайхан нарын иргэд мэдээлэл хийлээ.

Хөдөлмөрийн сайд асан Г.Баярсайхан:

-Цагаан сарын дараа хурдан морины уралдаанууд зохион байгуулагдах гэж байна. Өвлийн улиралд хурдан морины уралдаан зохион байгуулах нь хүүхэд эрүүл мэнд, амь насаараа хохирох эрсдэлтэй. Би Хөдөлмөрийн сайдаар ажиллаж байхдаа 2016 онд А/36 дугаар тогтоолыг гаргаж байсан. Хүүхдийн тэвчишгүй хөдөлмөрийг устгах НҮБ-ын конвенцод манай улс нэгдсэний дагуу өвөл, хаврын улиралд хурдан морины уралдааныг жил бүрийн арваннэгдүгээр сарын 1-нээс тавдугаар сарын 1-ний хугацаанд хурдан морины уралдаан, сунгаа, үсэргээ зохион байгуулахыг хориглосон байдаг.

Тухайн үед яагаад ийм шийдвэр гаргасан бэ гэхээр 1990 онд дээрх хүүхдийн эрхийг хамгаалах конвенцод манай улс нэгдэн орсон. Конвенцод хүүхдийн тэвчишгүй бүх төрлийн хөдөлмөрийг устгахаар заасан. Түүнээс хойш 2016 онд манай Засгийн газар, Хөдөлмөрийн яам дээрх А/36 захирамжийг гаргасан. Өвөл, хавар хурдан морины уралдаан зохион байгуулахыг хориглосон явдал нь чухал шийдвэр байсан.

Судалгаагаар 1996 оноос хойш 50 гаруй хүүхэд хурдан морь унаж яваад амиа алдсан байна. Өвөл, хаврын морин уралдааны үеэр байсан. Гэтэл 2016 оны шийдвэрийг удалгүй өөрчилж, буцааж сэргээсэн. Одоогийн хүчин төгөлдөр мөрдөж буй эрх зүйн зохицуулалтаар арваннэгдүгээр сарын 1-ээс тавдугаар сарын 1-ний хооронд хурдан морины уралдаан зохион байгуулах нь хориотой. Гэтэл хурдан морины уралдааныг зохион байгуулж ирлээ. НҮБ-ын өмнө хүлээсэн үүргээ Монгол Улс биелүүлэхгүй байна.

Хурдан морины уралдааныг эрх баригчид, холбогдох албан тушаалтнууд таслан зогсоох ёстой. Гэтэл уяач гишүүд хурдан морины уралдааныг дэмжиж байна. УИХ өөрсдийн гаргасан шийдвэр болох НҮБ-ын конвенцод нэгдэн орсон шийдвэрээсээ ухарч байна.

Хэрэв энэ хавар хурдан морины уралдаан зохион байгуулах юм бол Засгийн газрыг олон улсын шүүхэд өгнө гэдгээ мэдэгдэе. Хаврын уралдааныг зохион байгуулах тухай хууль тогтоогч гишүүд өөрсдөө ярьж байна. Хуульд өөрчлөлт оруулах замаар өвөл, хаврын уралдааныг зохион байгуулахыг зөвшөөрсөн шийдвэр гаргавал санаачилсан УИХ-ын гишүүдийг “Хүүхдэд ээлгүй улстөрч”-өөр зарлана. МАН, АН-ын алинд нь ч уяачид байгаа.

Жирийн малчин айлууд бол энэ өвлийн хүйтэн, хаврын тарчиг үед хурдан морь уралдуулах цаг завгүй байгаа. Энэ жил маш хүнд өвөл болж байна. Ийм байхад заавал хурдан морины уралдаан зохион байгуулах ямар хэрэгтэй вэ. Өвлийн хурдан морины уралдааны үеэр нас барсан хүүхдүүд нь жирийн иргэдийн хүүхдүүд байсан.

“Топ хурд Дүнжингарав” уралдааныг зохион байгуулах гэж байгаа юм билээ. Хүүхдүүдийнхээ эрүүл мэндийг хамгаалж Л.Оюун-Эрдэнийн Засгийн газар энэ уралдааныг зогсоох ёстой. Нүдэн дээр нь уралдаан зохион байгуулж байгааг мэдсээр байж зогсоохгүй бол Олон улсын шүүхэд хандана гэв.