Эртний нийслэл Хархорин дахь “Эрдэнэсийн хүрээ Монгол бичлэгийн урлагийн төв”-д зочилсон тэмдэглэл


1 сар

Энэ сарын 25-ны өглөө бидний хэдэн сэтгүүлчид Монголын анхны нийслэл Хархорин хотыг зорилоо. Замд зөөлөн бороо шивэрч, газар дэлхий бүхэлдээ ногоорсон байгаа нь аргагүй л зун цаг ирснийг санагдуулах аж.

Бидний зорилго бол соёлын биет бус өвд бүртгэгдсэн “Эрдэнэсийн хүрээ Монгол бичлэгийн урлагийн төв”-ийн нээлтэнд оролцож, уран зургийн үзэсгэлэнг үзэж, тэр сайхан өв соёлыг иргэддээ танилцуулахаар явсан юм.

Монголын эртний нийслэл Хархорин хотод тэртусмаа олон мянган жилийн түүхийг хадгалж байгаа газар улс үндэстний өв соёлыг хадгалсан уран зургийн үзэсгэлэнг монгол гэрт гаргасан нь үнэхээр нүд баясгаж байсан юм. Бүх л зүйл түүх, соёлыг хадгалж байв.

Эрдэнэсийн Хүрээ 2013 онд ЮНЕСКО-гоос яаралтай хамгаалах Соёлын биет бус өвд бүртгэгдсэн монгол уран бичлэг болон уламжлалт монгол бичгийг гайхамшигтай урлаг болгож олон нийтэд таниулан сурталчлах, баяжуулах, сургах, өвлүүлэх, үнэлэмжийг сэргээх, хадгалан хамгаалах зорилгоор 2019 онд нээгдсэн аж.

Монгол уран бичлэгээс гадна хөгжлийн бэрхшээлтэй иргэдийн нийгэмдэх оролцоог бий болгох, урлаг, соёлын боловсрол олгох, ялангуяа бийрийн урлагаар буюу монгол уран бичлэгээр дамжуулан бие болоод сэтгэл заслын арт-терапи хийх ажлыг 2021 оноос хойш эхлүүлэн явуулж байгаа нь олон хүний талархалыг хүлээж байлаа. Түүнчлэн олон улсын урлаг солилцооны /Art Residency/ төвийг байгуулж, жил бүр дэлхийн шилдэг уран бүтээлчдээс сонгон шалгаруулан, тэтгэлэгтэй хөтөлбөр хэрэгжүүлж байгаа талаараа үзэсгэлэнг зохион байгуулагчид хэлж байлаа.

Үзэсгэлэнг үзэхээр гадаад, дотоодын жуулчид олноор ирж, монгол бичгийн талаар гайхан биширч байв.

 Хархорин хот нь Их Эзэн богд Чингис Хааны зарлигаар байгуулагдсан хот төдийгүй тухайн үеийн худалдаа, арилжаа, шашин, олон улсын харилцаа, соёлын гол уулзвар болсон төв цэг байсан бөгөөд өнөө бидний үед “Торгоны зам”- ын гол цэг гэж нэрлэгдэх болсон байна. Мөн энэ л газар Уйгур бичгийг үндэслэж монгол бичгийг бүтээсэн юм. Ийм учраас Эрдэнэсийн хүрээг Хархорин хотод байгуулсан аж.

Энэхүү төв нь монгол уран бичлэгийн урлаг болон энэхүү соёлын өвийг хадгалан хамгаалах үйлсэд зориулагджээ. Энэхүү санаачилгын ард дэлхийн нэрт уран бичээч Тамирын Самандбадраа байгаа бөгөөд та түүний бүтээлийг тэндээс бишрэн үзэх боломжтой. Тэрбээр, хүний дотоод сэтгэлийн торгон мэдрэмжийг бийр, бэх, цаас ашиглан илэрхийлдэг калиграфч, зураач билээ.

Тус төв нь улсын соёлтой уялдуулан, байгальд ойр байх үүднээс бүхэлдээ гэрүүдээс бүрддэг. Үзэсгэлэнд гарсан уран бүтээл болгон өөрийн гэсэн онцлогоос хамаарч нэртэй байдаг. 

Эрдэнэсийн хүрээ нь Монгол болон бусад орны уран бичээч, уран бүтээлчдийг уламжлалт монгол  соёлын орчинд хүлээн авах төв болох зорилготой ажиллах юм байна.

Энэ үеэр Францын уран бүтээлч, барын урлаач Агнес Дубарт  өөрийн уран бүтээлийн үзэсгэлэнгээ гаргаж байсан юм. Тэрбээр, монгол хүний нүдийг зураад, тэр хүнээсээ ямар нэгэн эд юмсыг бэлэгэнд авч, түүгээр нь тухайн хүний дотоод илэрхийлэмжийг гаргаж ирсэн нь их сонирхолтой. Хүний нүдийг зурахын тулд эхлээд сэтгэл зүйн байдалтай нь холбоотой 4-5 асуулт асуудаг байна. Ингээд тухайн өгсөн эд юмсаар нь тэр хүний дотоод мэдрэмжийг дүрслэн харуулсан нь их гайхмаар.

Үзэсгэлэнд гарсан уран бүтээлийг үзсэн сэтгүүлч миний бие Монголынхоо түүх, өв соёлоор аялаж, уран бүтээлчтэй ярилцахад түүний үл танигдах дотоод ертөнцөд уусаж байлаа.

Post image
Анхааруулга: Уншигчдын бичсэн сэтгэгдэлд Bestnews.mn хариуцлага хүлээхгүй болно. Зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах хэрэгтэй.
Та мэдээнд саналаа өгсөн байна
1000 Сэтгэгдэлээ бичнэ үү