Өнөөдөр МАН-ын Удирдах зөвлөл хуралдаж УИХ-ын шинэ даргын нэрийг тодруулж, намын бүлэгтээ нэр дэвшигчийг танилцуулах юм байна. УИХ-ын дараагийн даргын нэрийг УИХ-д өргөн мэдүүлснээр маргаашдаа багтаан хэлэлцэн, томилно. Энэ талаар УИХ-ын гишүүн Ж.Энхбаяраас тодрууллаа. 

-УИХ-ын шинэ даргыг томилох асуудлыг хэзээ намын Удирдах зөвлөлөөр хэлэлцэх вэ?

-УИХ-ын даргыг Их хуралд олонх болсон нам дэвшүүлнэ. Энэ зарчмын дагуу МАН-ын дарга Удирдах зөвлөлд асуудал оруулна. Удирдах зөвлөл өнөөдөр хуралдаж намын бүлэгт нэр дэвшигчийг танилцуулна. 

-Таны хувьд  ямар шаардлага хангасан хүн УИХ-ын даргаар томилох ёстой вэ? 

-Монгол Улс парламентын засаглалтай. Тэгэхээр парламентын үйл ажиллагааг удирдаж, зохицуулж явах хүн ажил,  төрийн албаар нэлээд сайн дамжсан, улс төрийн үйл явцыг сайн ойлгодог, Монгол Улсын гадаад дотоод нөхцөл байдалд дүн шинжилгээ хийх чадвартай, улс орныхоо гадаад бодлогын асуудлыг ойлгодог, улс орны аюулгүй байдал, батлан хамгаалах, үндэсний язгуур эрх ашгийг ойлгож мэдэрдэг, хамгийн гол нь УИХ-ын үйл ажиллагааг нийгмийн хүсээд байгаа үйл явц руу чиглүүлж, УИХ-ын манлайллыг бий болгох чадвартай хүн хэрэгтэй. 

МАН-ын 64 гишүүн УИХ-д байна. Энэ дотроос УИХ-ын үйл ажиллагааг удирдаад аваад явчих хэмжээний бэлтгэгдсэн, төрийн, улс төрийн ажлын туршлагатай, олон түмний итгэлийг хүлээж олон удаа сонгогдож, нийгмээс дэмжлэг авсан, чадвартай хүмүүс олон бий. Эдгээрээс хэнийг сонгохыг нам шийднэ. 

-Таны нэр УИХ-ын  даргад яригдаж байна гэсэн мэдээлэл гараад байгаа. Энэ тал дээрхи таны байр суурь ямар байна ?  

-Энэ асуудлыг нам шийднэ. Санал солилцож байгаа. 

-Чуулган завсарлахаас өмнө УИХ-ын даргыг томилж амжих уу?

-Амжина. Маргааш гэхэд УИХ-ын шинэ даргыг томилох байх