НИТХ өнгөрсөн долоо хоногт хуралдаж нийслэлийн Засаг дарга бөгөөд Улаанбаатар хотын захирагчаар С.Мөнхчулууныг сонгосон. НИТХ энэхүү шийдвэрээ Монгол Улсын Ерөнхий сайдад илгээж батламжлуулснаар түүний бүрэн эрх баталгаажих юм. Харин Ерөнхий сайд С.Мөнхчулууныг Засаг даргаар батламжлахаас татгалзсан гэсэн мэдээлэл өнөөдөр гарсан. Гэвч энэхүү мэдээлэл нь ташаа бөгөөд НИТХ-аас С.Мөнхчулууныг Засаг даргаар сонгосон тухай албан бичиг Засгийн газрын Хэрэг эрхлэх газарт ирээгүй байна. Энэ нь НИТХ-ын дарга С.Амарсайхан С.Мөнхчулууныг нийслэлийн Засаг дарга бөгөөд Улаанбаатар хотын захирагчаар сонгогдсоныг хүлээн зөвшөөрч НИТХ-ын шийдвэрт гарын үсэг зурж, тамга дараагүйтэй холбоотой гэсэн мэдээлэл байна.