Үндсэн хуулийн 37.1-т “Ерөнхийлөгч УИХ-д ажлаа хариуцна” гэсэн заалт бий. Үүний дагуу Монгол Улсын Ерөнхийлөгч Х.Баттулга бүрэн эрхээ хэрэгжүүлж эхэлснээс хойшх нэг жилийн хугацаанд хийсэн ажлынхаа тайланг УИХ-д хүргүүлжээ. Ерөнхийлөгч нэг жилийн хугацаанд УИХ-ын чуулганы нэгдсэн хуралдаанд найман удаа оролцсон байна. Мөн УИХ-аас баталсан дөрвөн тогтоолд хориг тавьж, хууль, шийдвэрийн гурван төсөл санаачлан өргөн барьжээ. Түүнчлэн зургаан албан тушаалтныг томилох асуудлаар УИХ-тай зөвшилцсөн байна.

            Дээр дурдсанчлан Монгол Улсын Ерөнхийлөгчөөр ажиллаж байсан хүмүүс ийнхүү УИХ-д ажлын тайлангаа хүргүүлсээр ирсэн. Харин Монгол Улсын Ерөнхийлөгч Ц.Элбэгдорж нэг удаа буюу 2015 оны дөрөвдүгээр сарын 20-нд 2013-2014 оныхоо үйл ажиллагааг УИХ-ын чуулганд биечлэн танилцуулж, гишүүдийн сонирхсон асуултад хариулж байсан юм. Ерөнхийлөгч Х.Баттулгын хувьд УИХ-д хүргүүлсэн тайлангаа чуулганы нэгдсэн хуралдаанд оролцож биечлэн танилцуулах эсэх нь тодорхойгүй байна.