УИХ-ын даргыг огцрохыг шаардаж буй гишүүд төв талбайд жагсаал зохион байгуулж байна. Энэхүү жагсаалд УИХ-ын гишүүн Ж.Батзандан, Л.Болд, Л.Оюун-Эрдэнэ, Х.Нямбаатар, Т.Аюурсайхан нар оролцлоо. Агаарын бохирдлын эсрэг жагсаал зохион байгуулахаар хүмүүс цугладаггүй гэсэн шүүмжлэл гардаг. Харин энэ удаагийн улс төрийн жагсаалд 20 гаруй хэмийн хүйтнийг үл ажран олон хүн цуглажээ. МАН-ын дотоод тэмцлээс үүссэн энэхүү жагсаалыг УИХ-ын гишүүн Ж.Батзандан нээж үг хэллээ. Жагсаалд оролцож буй УИХ-ын гишүүд ээлж дараалан үг хэлсэн юм. УИХ-ын гишүүн Л.Болд “Стратегийн ордуудыг МАНАН бүлэглэлийнхэн цөлмөөд дууслаа. Нийтдээ 15 орд бий. Үүний хоёрыг нь хоосолчихсон. Үлдсэн 13-ыг нь ард түмэндээ өгнө. Бид зорилгоо биелүүлснийхээ маргааш энэ 13 ордыг ард түмэндээ өгөх хууль гаргана. Хэрэв гаргаж чадахгүй бол Монголын ард түмэн биднийг ч хамт зайлуулах хэрэгтэй. Энэ бол 40 гишүүний амлалт. Бид үүнийг хийнэ” гэлээ.

УИХ-ын гишүүдийн санаачлан зохион байгуулж буй энэхүү жагсаалд өмнө нь Ерөнхий сайдыг огцруулахыг эсэргүүцэж жагсаал зохион байгуулсан Нэхүүл хөдөлгөөн, “Үнэн ба зөв” гэх мэт жижиг намууд оролцож байна.

Жагсаал зохион байгуулж буй гишүүд Төрийн ордонд орж УИХ-ын даргыг огцруулах шаардлагаа УИХ-ын Тамгын газрын дарга Ц.Цолмонд гардуулан өглөө. Тэд УИХ-ын даргыг 72 цагийн дотор огцрохыг шаардаж байгаа ажээ. Хэрэв шаардлагыг хүлээж авахгүй бол ирэх нэгдүгээр сарын 10-нд дахин жагсаал зохион байгуулахаа мэдэгдлээ.