Хөвсгөл аймгийн Засаг дарга Л.Ганболдын үйл ажиллагааны мөрийн хөтөлбөрт тусгагдсан "Аялал жуулчлалын тулгуур төв болох" зорилтын хүрээнд Хөвсгөл аймагт 150 мянган жарамгайг үржүүлж, байгаль экологийн нөөцийг бүрдүүлэхээр "Загас үржүүлгийн төв" байгуулаад байна.

Тус төв нь "Монголын загас хамгаалах тул холбоо" төрийн бус байгууллагатай хамтран Төмөрбулаг сумын Олон голын бэлчир гэдэг газраас Зэвэг загас барьж 150 мянган жарамгайг Баянгол болон Дэлгэрмөрөн голын тохой ай, савд тавьж үржүүлж байгаа бөгөөд цаашдаа загас үржүүлгийн цөөрөм байгуулах гэнэ.

Тус аймгийн ИТХ-аас аялал жуулчлалыг хөгжүүлэх, Засаг даргын мөрийн хөтөлбөрт тусгагдсан ажлыг хэрэгжүүлэхэд 40 сая төгрөгийн төсөв баталжээ. "Аймгийн хэмжээнд сүүлийн жилүүдэд 4-5 дахин цөөрсөн загасны тоог нэмэгдүүлэх, байгаль экологийн нөөцийг бүрдүүлэхээр эхний ээлжинд 150 мянган жарамгайг авчирч үржүүлж байна. Засгийн газрын тогтоолоор нэг загасны үнэлгээ 17 мянган төгрөг байгаа.  Өнөөдрийн байдлаар 150 мянган жарамгайд 25 сая төгрөг зарцуулж байгаа бөгөөд энэ нь 2 тэрбум 550 сая төгрөгийн үнэлгээтэй нөөц бүрдүүлж байгаа чухал ач холбогдолтой юм" хэмээн Засаг дарга Л.Ганболд онцоллоо.

Орон нутагт загас үржүүлж Цөөрмийн аж ахуйг байгуулснаар байгаль экологийн тодорхой нөөцийг бүрдүүлэх, загас агнуур, спорт загасчлалын уралдаан тэмцээнийг зохион байгуулах боломж бүрдэх, Хөвсгөл брэндийг бий болгох, загасны үнэлгээгээр улсдаа тэргүүлэх зорилтын хүрээнд мэргэжлийн байгууллага, эрдэмтэн судлаачид, төрийн болон, төрийн бус байгууллагуудтай хамтран тодорхой судалгаа, тандалтыг хоёр жилийн хугацаанд хийсний дүнд "Загас үржүүлгийн төв" байгуулжээ.