АТГ-аас цаг үеийн асуудлаар мэдээлэл хийлээ. Энэ сард нийтийн албанд нэр дэвшихээр 968 иргэн материалаа АТГ-т ирүүлжээ. Зэвсэгт хүчний жанжин штаб, Нийгмийн даатгалын ерөнхий газар, Мэргэжлийн хяналтын ерөнхий газар, Оюуны өмч, улсын бүртгэлийн ерөнхий газраас хамгийн их мэдүүлэг ирсэн байна. Өөрөөр хэлбэл, энэ сард тус байгууллагуудад төрийн албан хаагчдын шилжилт хөдөлгөөн их явагджээ. 968 иргэнээс зургаан иргэнийг ашиг сонирхлын зөрчилтэй гэж үзэн буцаасан байна. УИХ-ын гишүүн Л.Энхболдын АТГ-т хандсан мэдээллийн дагуу Тавантолгойн уурхайгаас 268.3 сая тонн нүүрс алдагдсан байж болзошгүй асуудлаар хэрэг нээн шалгаж байгаа ажээ. Өнөөдрийн байдлаар АТГ 305 эрүүгийн хэрэг шалгаж байгаа бөгөөд энэ нь өнгөрсөн оны нэгдүгээр улиралтай харьцуулахад дөрөв дахин нэмэгдсэн үзүүлэлт гэдгийг онцоллоо.   

АТГ-аас мэдээлэл хийхээс өмнө УИХ-ын гишүүн Л.Болд, Ж.Батзандан нарт эрүүгийн хэрэг үүсгэсэн тухай мэдээлэл гараад байсан юм. Гэвч АТГ үүнийг үгүйсгэж "Эрүүгийн хэрэг үүсгээгүй. Харин иргэнээс ирсэн гомдлын дагуу тодруулга авах шаардлага үүссэн" гэв.