УИХ-ын Өргөдлийн байнгын хороо өнөөдөр хуралдлаа. Хуралдаанаар Туул голын сав газар, түүний ойр орчимд элс хайрга олборлохыг зогсоох тухай Засгийн газарт чиглэл өгөх тухай 03 дугаар тогтоолын хэрэгжилтийг хэлэлцсэн юм.

Туул голын сав газар түүний ойр орчимд элс хайрга олборлож байсан 95 тусгай зөвшөөрлийг цуцалсан байна. Тэгвэл одоо элс, хайрга, шавар олборлох эрхтэй 54 лиценз, хайгуулын 74 лиценз байгаа аж. Холбогдох албаныхны тайланг сонссоны дараа гишүүд Туул голоос хайрга, дайрга олборлож байгаа бол хөдөө орон нутагт гол уснаас алт олборлож байна. Тиймээс голын ай сав дагасан олборлолтын асуудлыг өргөн хүрээнд авч хэлэлцэх ёстой гэдгийг хэлж байлаа.

Байнгын хороо 19 гишүүнтэй. Чуулган завсарласан өдрүүдэд гишүүд хөдөө орон нутаг болоод гадаадад томилолттой байгаа учир ирц бүрдэхгүй таван гишүүтэй хуралдсан юм.