ОУВС-ийн Өргөтгөсөн санхүүжилтийн хөтөлбөрийн 3 дахь шатны хэлэлцээрийн үр дүнгийн талаар Сангийн сайд Ч.Хүрэлбаатар, Монголбанкны тэргүүн дэд ерөнхийлөгч О.Эрдэнэбилэг, ОУВС-ийн ажлын хэсгийн ахлагч Жефф Готлеб нар өнөөдөр танилцууллаа.

Өргөтгөсөн санхүүжилтийн хөтөлбөрийн үр дүнд Монгол Улсын эдийн засаг 2018 онд 5 орчим хувиар, 2019 онд 6.3 орчим хувиар өсөх төлөв ажиглагдсан байна. Эдийн засаг, төсвийн үзүүлэлтүүд сайжирсан тул ОУВС-тай тохирсон зарим арга хэмжээг эргэн харах, дахин ярилцах шаардлагатай гэж үзэн яриа хэлэлцээр хийж, дараах асуудлаар тохиролцоонд хүрчээ.

Үүнд:

• ХХОАТ-ын нэмэгдлийг хуучин хэвэнд оруулж 10 хувь болгох
• Шатахууны онцгой албан татварыг тэглэх: АИ-80, АИ-92 түлшийг онцгой албан татвараас чөлөөлөх
• Тэтгэвэрт гарах насыг сонголттой болгох: Тэтгэврийн насыг хуучнаар буюу эмэгтэй 55, эрэгтэй 60 насандаа, хөдөлмөрийн хэвийн бус нөхцөлөөр ажилладаг 45-55 настай даатгуулагч өөрөө хүсвэл тэтгэвэр тогтоолгох нөхцөлийг бүрдүүлэх, Үргэлжлүүлэн ажиллах хүсэлтэй даатгуулагчийн тэтгэвэрт гарах насыг жилд 6 сараар нэмж байсныг 3 сар болгох
• Тэтгэвэр тогтоолгох дараалсан 5 жилийг 7 болгох
• Төрийн албан хаагчдын цалинг 2018 оны дөрөвдүгээр улирлаас нэмэх

Хэлэлцээрийн үр дүнд тохиролцоонд хүрсэн дээрх асуудлуудыг шуурхай хэрэгжүүлэх үүднээс холбогдох хуулиудад нэмэлт, өөрчлөлт оруулж УИХ-ын нэгдсэн чуулганаар батлуулсан талаар Сангийн сайд Ч.Хүрэлбаатар, ОУВС-ийн ажлын хэсгийн ахлагч Жефф Готлеб нар танилцууллаа .