"Apple" корпорацын анхны ухаалаг мэдрэгчтэй iPhone загварын гар утас бүтээсний 10 жилийн ой энэ онд тохиож байгаа. Тус корпорац 10 жилийн ойн хүрээндээ "iPhone 10" утсаа танилцуулж, өнгөрсөн Баасан гарагт дэлхийн 100 гаруй хотын зах зээлд гаргаад байна. Зах зээлд нэвтрэхээс хэдхэн хоногийн өмнөхөн “Business Insider” сэтгүүлд бичсэнээр ""Apple" компанийн шинэ аппарат гаднаа гял цал, ганган чамин харагдаж буй ч хамгийн өндөр шаардлага тавьдаг хэрэглэгчдийн эрэлт хэрэгцээг хангаж чадахгүй байна, улмаар "iPhone X"-ийн эрэлт огцом унах төлөвтэй байгаа" хэмээн мэдээлж байсан.

"Apple"-ийн нийт орлогын 60-70 хувь нь iPhone-оос шалтгаалдаг учраас, хэрвээ төлөв байдал үнэн бол тэд санхүүгийн хувьд маш хүнд сорилттой тулгарах байсан юм. Харин зах зээлд гарсан өдрөөсөө эхлэн мянга мянган хэрэглэгчид энэхүү утсыг худалдан авахаар дэлгүүрийн гадна урт дараалал үүсгэжээ. Австралийн Сидней хотод л гэхэд нээлтийн өдрийн өглөөний 8 цаг гэхэд 1000 гаруй хэрэглэгчид урд дараалал үүсгэн нээлтийг хүлээж байлаа. Мөн Их Британи, Япон, Өмнөд Солонгос, Сингапур дахь "Apple"-ийн дэлгүүрүүдэд ч урт дараалал үүсээд байна. Хятад л гэхэд, өглөөний 5 цагт эхний үйлчлүүлэгч дугаарлаж эхэлжээ.

""iPhone 10"" гар утсыг нийтдээ 10 сая ширхгийг үйлдвэрлэн борлуулахаар төлөвлөөд байсан бол  дэлхий даяар явуулсан урьдчилсан захиалгын дүнгээс харахад 50 сая хол даваад байгааг тус компанийн худалдаа борлуулалт хариуцсан захирал мэдээлж байна. "iPhone 10" гар утасны тухайд, ямар ч товчлуургүй бөгөөд "Фэйс Айди" буюу нүүр царайг таних технологийг суулгаж өгссөнөөрөө онцлогтой. 3D камер суулгаж өгсөн учраас хурууны хээ таних технологиос илүү, хурдан бас шинэлэг юм. Мөн өндөр нягтшилтай, 16 мегапикселийн камертай. Мөн утасгүй цэнэглэгчээр цэнэглэгдэх юм байна.