БНСУ-ын тусгай элчийн багийн ахлагч, Хөх ордны үндэсний аюулгүй байдлын албаны дарга  Чүн Эйү-Ён БНАСАУ-д хийсэн айлчлалынхаа талаар мэдээлэл хийжээ. Тэрээр ирэх дөрөвдүгээр сарын сүүлээр Умард, Өмнөд хоёр Солонгос Паммунжонд дээд хэмжээний хэлэлцээ хийхээр тохирсон гэжээ. 

Хөх ордны хэвлэлийн бага  хуралд оролцсон Чүн Эйү-Ён БНСУ нь Солонгосын хойгийг цөмийн зэвсэггүй болгох талаар байр сууриа илэрхийлж, АНУ-тай яриа хэлэлцээ хийх хүсэлтэй байна гэсэн байна. БНАСАУ-ын тал “Хэрэв Умард Солонгосыг цэргийн талаар сүрдүүлэхээ больж, тогтолцооны аюулгүй байдлыг баталгаажуулбал, Умард Солонгос цөмийн зэвсэгтэй байх шаардлагагүй юм”  гэж мэдэгдсэн ажээ. Энэ сарын 5-нд БНАСАУ-ын дээд удирдагч Ким Жон Ун БНСУ-ын тусгай элчийн баг бүрэлдэхүүнийг хүлээн авч уулзан, оройн зоог  барьсан юм.