АНУ-ын чөлөөт бөхийн анхны эмэгтэй олимпийн аварга Хелен Марулис өнгөрсөн сард Парист болсон насанд хүрэгчдийн ДАШТ-д таван барилдаан хийхдээ бүх өрсөлдөгчөө оноогоор цэвэр ялж тасархай түрүүлсэн билээ. Өдгөө 26 настай тэрбээр Грекийн нийслэл Афинд болж байгаа өсвөр үеийн ДАШТ-д хүндэт зочноор оролцож байна.

Түүний хувьд чөлөөт бөхийн залгамж халаа болсон өсвөрийн тамирчдад итгэл найдвар, урам зориг өгөх үүднээс тэмцээний зохион байгуулагчдын урилгыг уриалгахан хүлээн авсан гэнэ. Тэгээд ч Грек улс Марулисийн хоёр дахь эх орон гэхэд хилсдэхгүй. Учир нь түүний өвөг эцэг, эмэг эх хоёр нь 1960-аад онд Грекийн Каламос арлаас АНУ-д цагаачилж ирсэн аж.