Чөлөөт бөхийн өсвөр үеийн ДАШТ өнөөдөр Грек нийслэл Афинд эхэлнэ. Манай тамирчдын салхийг охидын 38, 43, 49, 56, 65 кг-ын жинд хагална. Дэлхийн бөхийн нэгдсэн холбоо (UWW) наймдугаар сарын сүүлээр Францын нийслэл Парист болсон насанд хүрэгчдийн ДАШТ-ий үеэр хуралдаж, нэг жингийн барилдааныг хоёр өдөр зохион байгуулах шийдвэрийг гаргасан. Анхных нь өсвөр үеийн ДАШТ-ээс эхлэн хэрэгжиж эхэлж байгаа нь энэ. Өсвөр үеийн ДАШТ-ий урьдчилсан шатны барилдаан монголын цагаар 17:30 минутад эхэлнэ. Манай улсаас өнөөдөр охидын 38 кг-д Баянхонгор аймгийн тамирчин Энхболдын Буман-Аюуш Украины Мария Томиштай, 43 кг-д Чингэлтэй дүүргийн тамирчин Батбаатарын Энхзул Туркийн Сейма Кизмазтай, 49 кг-д Сэлэнгэ аймгийн тамирчин Дагвадоржийн Отгонжаргал Энэтхэгийн Анкуштай, 56 кг-д Баянхонгор аймгийн тамирчин Өлзийсайханы Пүрэвсүрэн ОХУ-ын Александра Прокинатай, 65 кг-д “Женко” клубийн тамирчин Дэлгэрцогтын Түмэнхүслэн Болгарын Сияка Ивановатай тус тус эхний тойргийн барилдаанаа хийх юм.