Тулгар төрийн 2226 жил, Их Монгол Улс байгуулсны 811 жил, Ардын хувьсгалын 96 жилийн ой, Баянхонгор хот байгуулагдсаны 60 жилийн түүхт ойн баяр наадам энэ сарын 21-22-нд Баянхонгор хотод болж улс, аймгийн алдар цолтой 256 бөх уран мэхийг уралдуулан барилджээ. Баянхонгор аймгийн Баянбулаг сумын харьяат, чөлөөт бөхийн насанд хүрэгчдийн Азийн АШТ-ий нэг мөнгө, гурван хүрэл медальт, ОУХМ, ЦЕГ-ын "Хүч" спорт хорооны тамирчин аймгийн хурц арслан Нацагсүрэнгийн Золбоо найм даван түрүүлэв. "Парис-2017" ДАШТ-д эх орноо төлөөлөн оролцох ОУХМ Н.Золбоо ийнхүү аймгийнхаа наадамд гурав дахиа түрүүлснээр ирэх намраас эхлэн Монголын бөхийн өргөөнд болох барилдаанд аймгийн арслан цолтнуудыг манлайлан барилдахаар болж байна.