УИХ-ын 2024 оны сонгуульд хойд бүсэд өрсөлдөх үеэрээ УИХ-ын гишүүн Х.Баттулга айл өрхийн 10 сая төгрөгийн хэрэглээний зээлийг тэглэх амлалт өгсөн аж. Тэрхүү амлалтаа Төгрөг нуурыг зарсан 250 сая ам.долларын төлбөрөөрөө барагдуулахыг УИХ-ын гишүүн Д.Батлут санууллаа.

Энэ тухай тэрбээр УИХ-ын чуулганы өнөөдрийн /2025.04.03/ нэгдсэн хуралдааны үеэр хөндлөө.

УИХ-ын гишүүн Д.Батлут “Манай хойд бүсээс олон гишүүн УИХ-д сонгогдсон. Тэдний нэг нь Х.Баттулга гишүүн. Эрдэнэтэд очиж иргэдтэй уулзахдаа “Байгалийн баялгаасаа ард иргэд хувь хишиг хүртэх ёстой” гэж ярьсан байна лээ.

УИХ-ын сонгуулийн үеэр 10 саяын хэрэглээний зээл авсан айл өрхийн зээлийг тэглэнэ гэж амласан. Бодоод байсан чинь эх үүсвэр нь тодорхой байсан юм байна. Айл бүрйн 10 саяын хэрэглээний зээлийг тэглэх зардлыг төсөвт суулгана гэвэл даахгүй. Харин эх үүсвэр нь тодорхой байсан учраас ярьж байсан юм байна гэж ойлголоо. Төгрөг нуурын ордыг 250 сая ам.доллараар зарсан байна.  Төгрөгт шилжүүлбэл өнөөдрийн ханшаар 830 тэрбум төгрөг болно. Хойд бүс 80 мянга гаруй өрхтэй. Тухайн үед нь Х.Баттулга худлаа ярилаа гэж бодож байсан, одоо бол итгэл үнэмшилтэй болж байна. Айл өрхийн хэрэглээний зээлийг тэглээрэй, амлалтыг нь нэхэж ажиллана” гэлээ.

Сүүлийн өдрүүдэд Монгол Улсын Ерөнхийлөгчөөр ажиллаж байсан Х.Баттулга стратегийн ордод хамаарах Төгрөг нуурын ордыг үндэстэн дамнасан санхүүгийн схем зохиож, оффшор бүсээр дамжуулан зарсан гэх ноцтой асуудал яригдах болсон. Төгрөг нуурын орд нь 3.1 тэрбум тоннын нүүрсний нөөцтэй орд юм.