УИХ-ын гишүүн асан Ц.Гарамжавтай холбоотойгоор Монполимет группийн охин компаниудын дансыг хаажээ. 

АТГ-аас тавдугаар сарын 28-нд УИХ-ын гишүүн асан Ц.Гарамжавыг хойшлуулшгүйгээр 48 хугацаатай баривчлан, сулласан. Түүнийг Хөгжлийн банкнаас авсан зээлээ зориулалтын бусаар зарцуулсан, мөнгө угаасан, гадаад улсад үл хөдлөх хөрөнгийг хууль бусаар авсан, өөртөө давуу байдал үүсгэн тусгай зөвшөөрөл авсан байж болзошгүй, тусгай зөвшөөрөл авахдаа Эрүүгийн хуульд заасан, өөр гэмт хэрэг үйлдсэн байж болзошгүй гэж хуулийн байгууллагаас мэдээлсэн. 

Харин түүний охин, Монполимет группийн ТУЗ-ийн дарга Н.Мөнхнасан групп компаниудын данснуудыг хаасан байгаа талаар өөрийн цахим хаягтаа мэдээлжээ.

Тэрбээр "Ээжийг хардсан хэрэгтэй огт хамааралгүй бүх компаниудын маань дансыг ч бас ямар нэгэн мэдэгдэлгүйгээр хаасан байх юм. Маргааш гарах ёстой 1300 ажилчдынхаа цалинг яаж тавих вэ. Бид зээлээ 200 хувь төлж дуусгасан. 32 жил татвар төлсөн. Хөрөнгө оруулагч нарынхаа өмнө хүлээсэн үүрэгтэй зуны цөөхөн саруудад цаг наргүй ажиллаж төлөвлөгөөгөө биелүүлдэг хамт олон. Бид нүүрсний хулгайчид биш, ЖДҮ биш. Бид төрөөс төрсөн тэрбумтнууд огтхон ч биш. Ойлгохоо байлаа" гэжээ.