Роботын хийсэн анхны бургер энэ долоо хоногоос АНУ-ын Калифорни мужийн хэрэглэгчдийн гар дээр очиход бэлэн боллоо.

Сан Франциско хотод төвтэй, хоол хийх зориулалттай робот бүтээгч "Creator"компанийн танилцуулж буй робот нь 20 компьютер, 350 мэдрэгч, 50 "хөдөлгөгч" механизмаас бүрдсэн аж. Хэрчих, шарах зэргээр бургер бэлтгэх ажлыг таван минутын дотор хийх чадвартай гэдгээрээ онцлог бөгөөд роботын бэлтгэсэн бургер нь зургаан ам.доллараар худалдаагдах юм байна.

"Creator” компанийг үүсгэн байгуулагч Энтрепренер Алекс Вардакостас есөн настайгаасаа эцэг, эхийнхээ түргэн хоолны ресторанд ажиллаж эхэлсэн бөгөөд хэрэглэгчдэд "Шинэ бургер" хүргэнэ гэж амлаж байгаа ажээ. Энэхүү төслийн баг бүрэлдэхүүнд “Apple”, “Tesla”, NASA болон “Walt Disney”-ийн судалгаа хөгжүүлэлтийн инженер, дизайнерууд багтсан байна.