Нийслэлийн Удирдах ажилтнуудын шуурхай зөвлөгөөн өнөөдөр боллоо. Хуралдааны эхэнд Улаанбаатар хотын ерөнхий менежер бөгөөд Захирагчийн ажлын албаны дарга Т.Гантөмөр нийслэлийн өвөлжилтийн бэлтгэж ажлын явцыг танилцуулав. Нийслэлийн 2017-2018 оны өвөлжилтийн бэлтгэлийг хангах ажлын хүрээнд нийт 1231 төсөл, арга хэмжээ хэрэгжүүлэхээр төлөвлөж, өнөөдрийн байдлаар 82 хувийн гүйцэтгэлтэй байгаа аж.

Эрчим хүчний эх үүсвэр буюу дулааны цахилгаан станцуудын өвөлжилтийн бэлтгэл есдүгээр сарын 6-ны байдлаар 81 хувь, инженерийн хангамжийн байгууллагуудын бэлтгэл 84 хувьтай байна.

Нийслэлийн Засаг даргын хэрэгжүүлэгч агентлаг, харьяа газрууд өвөлжилтийн бэлтгэл ажлын хүрээнд 236 төсөл, арга хэмжээ хэрэгжүүлэхээр төлөвлөж, 81 хувийн биелэлттэй байгаа юм. Дүүргүүдийн өвөлжилтийн бэлтгэл ажлыг гүйцэтгэлийг дараахь хүснэгтээс харна уу.

Д\д	Дүүрэг	Төлөвлөсөн арга хэмжээ	Биелэлт 2017.09.06-ны байдлаар
1	БАГАХАНГАЙ	18	74%
2	БАЯНГОЛ	11	85%
3	НАЛАЙХ	39	87%
4	СОНГИНОХАЙРХАН	43	75%
5	ЧИНГЭЛТЭЙ	18	85%
6	БАЯНЗҮРХ	216	81%
7	СҮХБААТАР	38	75%
8	ХАН-УУЛ	32	85%
9	БАГАНУУР	13	81%
	Нийт	428	81%

 

Үүнээс гадна Улаанбаатар хотын дулааны төв шугамд нийт 12 зогсолт хийхээс засварын ажил  төлөвлөгөөний дагуу хийгдэж, есдүгээр  сарын 5-ны байдлаар 11 зогсолт бүрэн хийгдэж дууссаныг ерөнхий менежер танилцууллаа.

Мөн 2017-2018 онд өвөлжилтийн бэлтгэл ажлын хүрээнд 902 тн бодис, 1500 тн давс нэмж нөөцлөхөөр худалдан авах ажиллагааг зохион байгуулж, гэрээ байгуулан ажиллаж байгаа ажээ.