Сонгуулийн ерөнхий хорооны хуралдаанаар УИХ-ын ээлжит сонгуулийн дүнгийн талаар хэлэлцэн сонгуулийн 29 тойрог тус бүрд хамгийн олон санал авсан, тухайн тойрогт ногдох мандатын тоотой тэнцүү тооны нэр дэвшигчдийг УИХ-ын гишүүнээр сонгогдсонд тооцсон тухай шийдвэрлэн тогтоол гаргалаа.

УИХ-ын гишүүнээр сонгогдогчдын нэрсийн жагсаалт урьдчилсан дүнтэй таарч байна. УИХ-ын гишүүний үнэмлэхийг зургаадугаар сарын 29-ний өдөр гардуулсны дараа ээлжит сонгуулийн дүнг холбогдох шийдвэрийн хамт УИХ-д өргөн мэдүүлэх юм. Үүний дараа сонгуулийн дүн, УИХ-ын гишүүнээр сонгогдсонд тооцсон тухай шийдвэрийг Монгол Улсын Ерөнхийлөгчид өргөн мэдүүлнэ.

УИХ-ын ээлжит сонгуулийн санал авах ажиллагаа лхагва гарагт болж, сонгогчдын нэрсийн жагсаалтад бүртгэгдсэн 2,003,969 сонгогчийн 73.65 хувь буюу 1,475,895 нь саналаа өгчээ. Энэ нь 2016 оны ирцтэй тун ойролцоо дүн болж байна.

Сонгогчийн санал авах ажиллагаа дууссаны дараа хяналтын тооллого хийх хэсгийг нам, эвслийн ажиглагчдаар, санамсаргүй сонголтын аргаар сугалуулан тогтоосон байна. Улсын хэмжээнд нийт 2070 хэсгийн 41.2 хувьд буюу 849 хэсэгт санал тоолох төхөөрөмжид уншигдсан саналын хуудсыг гар аргаар тоолоход ямар нэгэн зөрчил илрээгүй байна.