Наймдугаар сарын байдлаар төсвийн нийт орлогын 26 хувийг уул уурхайн салбараас бүрдүүлсэн байна. Тухайлбал, “Эрдэнэс Таван толгой” компани оны эхний найман сарын байдлаар улсад 222.6 тэрбум төгрөгийн татвар төвлөрүүлсэн нь өмнөх оны мөн үеэс 40 гаруй хувиар өссөн үзүүлэлт болж байна.

Харин “Оюу Толгой” компани тайлант хугацаанд 275.4 тэрбум төгрөгийн татвар төлсөн нь өмнөх оны мөн үеэс 37 хувиар өссөн үзүүлэлт болжээ. Дээрх хоёр компанийн төлсөн татварын хэмжээ уул уурхайн салбарын төвлөрүүлсэн татварын 30 орчим хувийг дангаараа бүрдүүлсэн байна. Уул уурхайн салбараас төсөвт төвлөрүүлж буй орлого сүүлийн жилүүдэд өсөх хандлагатай байгаа аж. Тухайлбал, 2013-2015 онд уул уурхайн салбар төсвийн орлогын 21-22 хувийг бүрдүүлж байжээ. Харин эрдэс бүтээгдэхүүний үнэ унасан 2016 онд хувь хэмжээ нь буурч 16 хувьд хүрсэн бол 2017, 2018 онд эргээд өссөн байна.

Эрдэс бүтээгдэхүүний үнэ унасан 2016 онд улсын төсөв 3.4 их наяд төгрөгийн алдагдалтай гарч байсан юм. Тайлант хугацаанд төсвийн нийт орлого, тусламжийн дүн 6.4 их наяд төгрөг хүрчээ. Үндэсний статистикийн хорооны мэдээлснээр төсвийн тэнцвэржүүлсэн тэнцэл 410 тэрбум төгрөгийн ашигтай гарсан байна.