Аялал жуулчлалын улирал ирж буйтай холбогдуулан Хөвсгөл аймгийн Иргэдийн төлөөлөгчдийн хурал, тусгай хамгаалалттай газрын хамгаалалтын дэглэмийг мөрдүүлэх, зүй зохистой аялах, аяллын хэвийн үйл ажиллагааг хангуулах зэрэг харилцааг зохицуулах зорилготой Хөвсгөл нуураар аялахдаа дагаж мөрдөх дүрмийг баталсан байна.
 
 Аялагч нь  тусгай хамгаалалттай газар нутгийн тухай хууль тогтоомж, дүрэм, журмыг чанд сахин биелүүлэх,  ховор ан, амьтан агнах, шувуу, амьтныг үргээхгүй байх, зохисгүй зүйлээр хооллохгүй байхыг эрмэлзэх, газар хөндөх, , мод огтлох, зөвшөөрөлгүй ил гал гаргахгүй байх, гол ус, нуурын орчмыг бохирдуулахгүй байхыг анхааруулсан байна.

Мөн хог хаягдлаа ангилж зориулалтын уут, саванд цуглуулан тусгай хамгаалалтын газар нутгийн нэвтрэх цэг дээр эсвэл тухайн буудалласан газрын хогийн цэгт хаях, зөвхөн тогтоосон зам, тэмдэглэгээ, маршрутын дагуу аялах, нуур, гол мөрний усанд машин, эд зүйлсээ угаахыг хориглосон байна.

Нуурын усанд зөвхөн зөвшөөрөгдсөн газар, зориулалтын хувцастай сэлэх бөгөөд журмыг зөрчсөн иргэн, хуулийн этгээдэд холбогдох хууль тогтоомжид заасны дагуу хариуцлага хүлээлгэнэ гэдгийг дүрмэнд тусгаж өгсөн байна.